Link açıqlığı

Saatnıñ esas haberi

Rusiye mahkemesi «qırımlı musulmanlar davasınıñ» altı mabüsiniñ apis cezasını uzattı – uquqçı


Uquqçı Lilâ Gemeci
Uquqçı Lilâ Gemeci

Rusiyeniñ Rostov-na-Donudaki Cenübiy okrugınıñ arbiy mahkemesi işğal etilgen Qırımnıñ Canköy rayonından «qırımlı musulmanlar davasınıñ» altı mabüsiniñ apis cezasını mayısnıñ 3-ne qadar uzattı. Bu aqta «Qırım birdemligi» cemaat birleşmesi uquqçı Lilâ Gemeciniñ malümatına esaslanıp haber ete.

Haberge köre, Osman Abdurazakov, Halil Mambetov, Ekrem Kroş, Leman Zekerâyev, Refat Seydametov ve Ayder Asanovnıñ imayesi devlet qabaatlavı tarafından berilgen müddetni uzatmaq içün sebepler «standart ve çoqtan formal ola», dep israr etti. Prokuror qayd etkenine köre, mabüsler adreslerini bilgen şaatlarğa tesir ete bile ve qırımlı musulmanlar mahküm etilgen madde pek ağır ola. İmaye buña itiraz etti, amma mahkeme bu itirazlarğa qulaq asmadı.

Mahkeme oturışuvında dava mabüsleriniñ evlerinde keçirilgen tintüvler vaqtında yasaqlanğan edebiyatnı gizliden qoyuv teşkerüviniñ neticeleri boyunca Rusiye Federatsiyasınıñ Tahqiqat komitetiniñ cevabını teşkermege planlaştırılğan edi. Bu teftişni prokuror talap etti. Oturışuvda devlet prokurorı bunıñnen bağlı dava açmaq talabı red etilgenine dair Tahqiqat komitetiniñ qararını taqdim etti.

Keçken oturışuvlarda imaye dava mabüslerine gizliden qoyulğan ve olarnıñ ev kitaphanesinde olmağan edebiyatnı qabul etilmeycek delil olaraq tanımağa rica etken edi. Dava mabüslerinden bazıları kitaplar doğrudan-doğru tintüv vaqtında qoyulğanını, digerleri ise bunı mahkemede yapqanlarını bildirdiler.

Devlet qabaatlayıcısı mahkemege FSB hadimleriniñ qanunsız tahqiqat usulları, hususan, mabüslerniñ evlerinde tintüvler vaqtında kitaplar gizliden qoyulğanı aqqında haberni teşkermek içün arbiy tahqiqat bölügine yollamağa rica etti. Mabüsler ve imayesi prokurornıñ muracaatına qoltuttı.

2023 senesi yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.

Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.

Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG