«Qurmandaki «Hizb ut-Tahrir» gruppasınıñ» qırımtatarları Arsen Abhairov, Rustem Emiruseinov ve Eskender Abdulganiyev mahkeme belgilegen müddetten çoq apishanede tutula, dep haber ete «Qırım birdemligi».
Daa yarım yıl evelsi olarnı sert rejimli koloniyağa avuştıracaq ediler. Bunı Rostov-na-Donu Cenübiy okrugınıñ arbiy mahkemesi belgilegen edi.
Mahkeme oturışuvı vaqtında siyasiy mabüs Arsen Abhairovnıñ muracaatı baqıldı, ükümge qarşı istinaf qararından soñ SİZOda bulunğan vaqtı apishane müddeti olaraq sayılacaqmı. Qadı Roman Plisko, mahkeme qararına köre, siyasiy mabüsler tahqiqat izolâtorında bulunğanları köz ögüne alınsa, eki yıl apishanede qalmalı, dep ayttı. Bundan soñ olarnı tüzetüv koloniyalarına avuştırmaq kerekler. Bıltır yanvar ayında siyasiy mabüsler apishanelerge avuştırıldı: Abhairovnı – Krasnoyarsk ülkesine, Emiruseinovnı – Saratov vilâyetine, Abdulganiyevni – Vladimir vilâyetine. Böylece, apishane müddetleri daa yarım yıl evelsi yekünlendi.
«Mabüs Abhairov Arsen Remziyeviçniñ azatlıqtan marum etüv cezasınıñ müddeti olaraq Cenübiy okrugınıñ arbiy mahkemesi qarar çıqarğan 2020 senesi noyabrniñ 30-ndan başlap mabüsniñ apishanege kelgen kününe qadar, yani 2021 senesi noyabrniñ 1-nden 2022 senesi yanvarniñ 13-ne qadar saymaq», – dep aytıla mahkeme qararında.
Abhairov tutulğan apishane memuriyeti ve devlet qabaatlayıcısı Vladislav Küznetsovnıñ fikirince, qırımtatarlar tam eki yıl apishanede tutulmalı – SİZOda tutulğanları sayılmamalı.
Rusiye penitentsiar sistemasında apishane eñ ağır ceza sayıla. Mabüsler kameralarda buluna ve areketleri sıñırlana. Sport, tasil ya da emek faaliyetlerine apishanede izin berilmey.
«Bugün Arsen Abhairov mahkeme belgilegen müddetten yarım yıl çoq apishanede buluna. Bilgenime köre, böyle apishanelerniñ sayısı Rusiyede yedi ola. Eñ uzaq soyu – Arsen bulunğan Krasnoyarsk ülkesinde», – dep ayttı advokat Edem Semedlâyev.
«Qurma gruppasınıñ» iştirakçileri 2019 senesi fevralniñ 14-nde tutuldı. 2020 senesi noyabrniñ 3-nde Cenübiy okrugınıñ arbiy mahkemesi «Qurman gruppası» davasınıñ mabüsleri Rustem Emiruseinovnı 17 yılğa üküm etti, Eskender Abdulganiyevni – 12 yılğa ve Arsen Abhairovnı – 13 yılğa. İlk eki yılını olar apishanede keçirmek kerekler.
Qırımtatarlar 2003 senesi Rusiye Yuqarı mahkemesiniñ qararınen terror teşkilâtları cedveline kirsetilgen ve Rusiyede yasaqlanğan «Hizb ut-Tahrir» islâm siyasiy firqası ile alâqaları bar olğanında qabaatlandı. Ukrayına ve diger memleketlerde teşkilât milliy qanunlar seviyesinde sıñırsız areket ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
