Rusiye kontrolindeki Aqmescitniñ Kiyev rayon mahkemesi «beşinci Bağçasaray gruppasınıñ» iştirakçileri Ruslan Asanov, Remzi Nimetulayev, Abdulmecit Seytumerov ve Eldar Yakubovnı apiste tutuv müddetini uzattı. Bu aqta «Qırım birdemligi» cemaat birleşmesi haber ete.
«FSB yañı bir şey aytmadı. Müvekkillerimiz saqlana bile, pek qorqunç cinayetçiler, terror maddelerine istinaden qabaatlana ve ilâhre. Bu isbatlanmay, tek tahminler bar. Aslında bu siyasiy mabüslerni özüne iftira atmağa istemegenleri içün, «terrorist» olğanlarını tanımağa istemegenleri içün tutula», – dep qayd etti advokat Emil Kurbedinov.
Uquqçı qırımtatarlarnıñ mahkeme esnasını din, millet, fikir içün siyasiy taqip dep adlandırdı. «Terrorizm ile küreş manaçığınen FSB istemegenlerni yoq ete», – dep qoştı o.
«Qırım platforması» sammiti keçirilgen soñ ertesi künü, avgustnıñ 24-nde, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi. Erkekler tutuldı.
O künü Rusiye kontrolindeki Aqmescitniñ Kiyev rayon mahkemesi Ruslan Asanov, Amethan Umerov ve Remzi Nimetulayevni eki ayğa SİZOda qaldırdı. Tutulğanlar Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
