Ekrem Kroş, Ayder Asanov, Leman Zekerâyev, Osman Abdurazakov ve Refat Seydametov 2024 senesi mayısnıñ 3-ne qadar izolâtorda qalacaqlar.
Devlet qabaatlayıcısı apis cezasınıñ uzatıluvını faallerni apiske aldıracaq sebepler deñişmedi dep añlattı. İmaye tarafı madde ağırlığı olarnı apiste tutmaq içün sebep degil, dep bildirdi.
Leman Zekeryayevniñ acele ameliyatqa ihtiyacı olğanına dair tibbiy vesiqalar mahkemege berildi, amma mahkeme imaye delillerine qulaq asmadı. Gemeci, imaye mahkeme qararını istinaf mahkemesinde şikâyet etecek, dep bildirdi.
Bundan ğayrı, «Gafarov» tahallüsli gizli şaat sorğuğa çekildi. Lilâ Gemeci şaat bütün suallerge azır cevap berdi ve lafında «adiy subette qullanılmağan» ibareler qullandı, dep tarif etti.
«Bu insannıñ adiy biri olğanını añlamağa yardım etti», – dep qayd etti uquqçı.
2023 senesi yanvarniñ 24-nde saba Canköy rayonında Rusiye uquq qoruyıcıları qırımtatarlarnıñ evlerinde tintüv keçirdi: Nemse Canköy (Blijnegorodskoye) köyünde Ekrem Kroş, Timofeyevka köyünde Ayder Asanov ve Refat Seydametov, Çoqraqlı Şeyh Eli köyünde (Dneprovka) Osman Abdurazakov, Canköyde Leman Zekiryayev ve Halil Mambetovnıñ evini.
Ekrem Kroşnıñ ömür arqadaşı Amideniñ «Qırım birdemligi» cemaat teşkilâtına bildirgenine köre, Qırım şimalinde tutulğan qırımtatarlar «terrorizmde» qabaatlana bile. Qırımlı musulmanlarğa mustaqil advokatlar alınmay, dep haber etilgen edi.
Qırımnıñ Rusiye yolbaşçısı Sergey Aksenov yanvarniñ 24-nde saba qırımtatarlarnıñ evlerinde keçirilgen tintüvlerni izaatladı. Onıñ aytqanına köre, uquq qoruyıcılar «Ukrayına ile alâqaları» bar olğanında qabaatlanğan altı vatandaşnı tuttı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
