Qırım işğali başlağanından 122 insan Rusiye uquq qoruyıcıları tarafından Rusiyede yasaqlanğan, amma çoqusı memlekette faaliyetine izin berilgen «Hizb ut-Tahrir» teşkilâtında iştirak etkeninde qabaatlanıp, «qırımlı musulmanlar davalarınıñ» mabüsleri oldı. Bu malümatnı Qırımtatar resurs merkezi öz saytında bere.
Qayd etilgenine köre, taqip etilgen 122 kişiden 119-ı – tamır qırımtatar halqından. 83-ü Rusiye apishane ve koloniyalarında tutula, 27-si SİZOda buluna, 3-ü ev apsinde, 8-i azat etildi, 1 kişi Rusiye apsinde vefat etti. Umumen Qırımtatar resurs merkezi «qırımlı musulmanlar» davaları boyunca Rusiye uquq qoruyıcıları qırımlılarnı 20 dalğada tutqanını esapladı.
«Bu «davalarda» qabaatlavlar «gizli şaatlarnıñ» malümatına ve Rusiye FSBsinen faal işbirligi yapqan «ekspertlerniñ» hulâsalarına esaslana. Yekâne «delil» tintüvler vaqtında tapılğan yasaqlanğan islâm edebiyatı, FSBniñ operativ malümatı ve mabüsler din ve siyaset mevzusında subetleşken ses qaydları oldı… Rusiye Federatsiyasınıñ bu siyaseti farqlı fikirler ve işğal etilgen Qırımda insanlarnıñ diniy ve siyasiy baqışlarınen küreşini köstere», – dep aytıla Qırımtatar resurs merkeziniñ haberinde.
Qırımtatar Resurs Merkezi bu davalarnıñ mabüslerine çıqarılğan ükümlerni lâğu etip, olarnı ve siyasiy sebeplerden apiske alınğan diger mabüslerni acele azat etmege talap ete. Qırımtatar Resurs Merkezi «Qırımda siyasiy taqiplerni toqtatmaq ve vaqtınca işğal etilgen Qırımda insan aqlarınıñ bozuluvından mesüliyetli olğan şahıslarğa qarşı sanktsiyalarnı kirsetmek maqsadınen» halqara toplulıqnı Rusiyege qarşı basqını quvetleştirmege çağıra.
Rusiye akimiyeti ve uquq qoruyıcıları bu malümatnı izaatlamay.