İşğal etilgen Qırımda çalışqan iş adamlarına 2023 senesiniñ ilk üç ayınıñ bergilerini Tula esaplarına tölemek kerek. Bu aqta Qırımtatar Resurs Merkeziniñ idare yolbaşçısı, Qırımtatar Milliy Meclisiniñ reisi Eskender Bariyev «Ğromadske radioğa» izaat berip ayttı.
«Qırımda çalışqan iş adamları 2023 senesiniñ ilk üç ayınıñ bergilerini ne içündir Tula esaplarına tölemek kerek. Sekiz yıl devamında yerli bücetlerge bergi ödediler, şimdi Tulağa. Şimdi paranı anda alğanları bir şey ola», – dep qayd etti o.
Bariyevniñ aytqanına köre, Qırımnıñ Rusiye memuriyeti propaganda işini yapa, balalarnen bile çalışalar.
«Bir çoq arbiy eksperti bar, cebedeki vaziyetni toqtamayıp izaatlay ve Rusiye ordusınıñ yañılıqlarını köstermege tırışa. Böylece imaye etilecekler, dep köstermege tırışalar», – dep ayta Bariyev.
Yalta Rusiye yolbaşçısı Yanina Pavlenko qanunsız ticaret obyektleri yıqtırıla, dep esabat berdi. Onıñ aytqanına köre, Uçan Su şelâlesi yanında fotoresim alanı ve Ay-Petrideki qave quruluvı yıqıla.
Qırımnıñ diger şeerlerinde de «qanunsız» obyektler yıqtırıla. Sudaqlı faal (telükesizlik maqsadınen gizli qalmağa istedi, çünki Rusiye akimiyeti tarafından repressiyalarğa oğratılğan edi) Qırım.Aqiqatqa izaat berip, Kapsel körfezinde obyektleri olğan iş adamları biznessiz qala, dep bildirdi. Onıñ aytqanına köre, bunıñ teşebbüsçisi Kapsel körfezinde büyük inşaat yapqan «Tavrida» art-klasteriniñ reberligi ola.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
