Bıltır avgust ayında Rusiye Federatsiyasınıñ uquq qoruyıcıları tarafından tutulğan qırımtatar faalleri ve «qırımlı musulmanlar davasınıñ» mabüsleri Abdulmecit Seytumerov, Amethan Umerov, Eldar Yakubov, Seydamet Mustafayev, Remzi Nimetulayeva ve Ruslan Asanov Qırımdan Rusiyedeki Rostov-na-Donu SİZOsına qanunsız bir şekilde avuştırıldı. Bu aqta avgustnıñ 5-nde Ukrayina prezidentiniñ Qırım Muhtar Cumhuriyetindeki temsilciliginiñ matbuat hızmeti bildirdi.
Berilgen malümatqa köre, tutulğan faallerniñ advokatları avgustnıñ 12-nde Rostov-na-Donu Cenübiy okrugınıñ arbiy mahkemesinde müvekkillerine qarşı oturışuvlar başlanacaq.
Daa evel haber etilgenine köre, Rusiye kontrolindeki Aqmescitniñ Kiyev rayon mahkemesi Seydamet Mustafayev, Eldar Yakubov, Abdulmecit Seytumerov, Ruslan Asanov, Amethan Umerov ve Remzi Nimetulayevni 2024 senesi noyabrniñ 24-ne qadar apiste qaldırdı.
2023 senesi avgustnıñ 24-nde, «Qırım platforması» sammitinden bir kün keçken soñ, Qırımda Rusiye uquq qoruyıcıları altı qırımtatarını tuttı. O künü saba Bağçasarayda ve Bağçasaray rayonında Remzi Nimetulayev, Ruslan Asanov, Seydamet Mustafayev, Amethan Umerov, Eldar Yakubov ve Abdulmecit Seytumerovnıñ evlerinde tintüvler keçirildi.
Şu künü Rusiye kontrolindeki Aqmescitniñ Kiyev rayon mahkemesi üçüni – Ruslan Asanov, Amethan Umerov ve Remzi Nimetulayevni eki ayğa SİZOğa aldı. Episi Rusiye Ceza kodeksiniñ 205.5 maddesiniñ birinci qısmına istinaden şübheli sayıldı – terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv. Laf Rusiyede yasaqlanğan Hizb ut-Tahrir teşkilâtı aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
