Uçucısızlarnıñ ücümi neticesinde Canköy rayonında silâ anbarına ücüm etilgeni qayd etildi, dep bildirdi Qırımnıñ Rusiye yolbaşçısı Sergey Aksenov.
«Qırımda ava mudafaa quvetleri ve radioelektron vastaları duşmannıñ 11 uçucısızını yoq etti. Canköy rayonında silâ anbarına uruldı. Uçucısız parçaları İslâm Terek rayonında mustaqil evge de zarar ketirdi», – dep yazdı o, Telegram kanalında.
Qırımnıñ Telegram kanalları bildirgenine köre, patlavlar Veseloye köyü tarafından keldi, anda resmiy şekilde çalışmağan arbiy uçaq alanı bar.
İyülniñ 18-nde Aksenov Qırımda doquz dron tüşürildi ve daa 19 dron radioelektron küreş sistemalarınen «yoq etildi», dep bildirdi.
İyülniñ 17-nde saba Qırımnıñ Rusiye yolbaşçısı Sergey Aksenov Keriç (Qırım) köpründe areket toqtatıldı, dep bildirdi. Onıñ aytqanına köre, Rusiyeniñ Krasnodar ülkesi tarafından 145-inci dayaq fevqulâde adise oldı.
Ukrayına Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayına Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o, «Suspilne» izaatlarında.
RBK-Ukrayına menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
