«Yug» Operativ komandanlığınıñ birleşken matbuat merkeziniñ reberi Natalâ Ğumenük24 kanalğa tünevinki Qırım ve Aqyar ücümini izaatladı.
«Er şey mantıqlı – baar, mevsim, «pamuq» aça. Amma endi-endi «sıralarnı tizip başladıq», şunıñ içün beklemek kerek. Bir deste toplarmız», – dedi Ğumenük.
Martnıñ 1-nde kündüz Aqyarda küçlü patlavlar aqqında haber etildi. Bundan ğayrı, yerli Telegram kanalları Kezlevde ve Saq rayonında Rusiye ava mudafaa sistemasınıñ işi aqqında yazdı. Yarımadağa Storm Shadow raketalarınen ücüm etildi, dep aytıldı. Telegram kanalları Sarabuzda darbeler oldı, dep haber etti. Rusiye akimiyeti ve arbiyleri bu haberni resmiy şekilde izaatlamadı.
Ukrayına Mudafaa nazirligi Baş istihbarat idaresiniñ yolbaşçısı Kırılo Budanov Qırımda işğalci küçler içün «yañı sürprizler» olacaq dep, adiy insanlarğa Keriç köpründen ketmemege tevsiye etti.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
