Ukrayına Mudafaa nazirliginiñ Baş istihbarat idaresi uçucısızlarnıñ Rusiye işğal etken Qırımnıñ Canköy ve İslâm Terek rayonlarına qarşı ücümini izaatladı.
Ukrayına Mudafaa nazirligi Baş istihbarat idaresiniñ vekili Andriy Yusov bildirgenine köre, Qırımnıñ Rusiye arbiy obyektlerine qarşı ücümler Kreml rejiminiñ «olarnı bile qorup olamağanını» köstere.
«Qırımdaki sabalar işğalciler içün ceennem ve ateşli oldı. Ve, şübhesiz, arbiyler ve işğalci memuriyet arasında keyfler artmay… Duşman Qırım bir arqa degil, telükeli bir yer olğanını añlay. Doğru da, şimdi yarımadanı terk ete bileler», – dep ayttı Yusov Ukrayına umummilliy telemarafonı yayınında.
İyülniñ 24-nde saba Aksenov Qırımda 11 uçucısız tesirsiz alğa ketirildi, dep bildirdi. Canköy rayonında silâ anbarından ğayrı, uçucısız parçaları İslâm Terek rayonındaki mesken evge zarar ketirdi. Canköy rayonınıñ bir qaç köyünde tahliye ilân etildi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
