İşğal etilgen Qırımğa qanunsız kelgen rusiyeliler yarımadanı acele terk etmeli. Bu aqta Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva brifingde ayttı.
«Başta Ukrayınağa qanunsız kelgen ve işğal altındaki Qırımda bulunğan Rusiye vatandaşlarına muracaat etemiz: ebet, Qırım güzel ve pek raat, amma toprağımızğa qanunsız kelgen er kesni şimdiden evlerine – Tümen, Elista, Saransk, İrkutsk, kelip çıqqan yerleriñizge qaytmañıznı rica etemiz», – dedi Taşeva.
Ukrayına aq qorçalayıcılarınıñ fikirince, 2014 senesinden soñ Rusiye işğal etken Qırımda eali Rusiye vatandaşlarınen deñiştirile. Olar bunı halqara gumanitar uquqnıñ bozuluvı ve cenk cinayeti dep adlandıralar.
Hatırlatamız, Ukrayına prezidentiniñ ofis yolbaşçısınıñ mesleatçısı Mıhaylo Podolâk Qırım sakinlerini sığınaqlarnı teşkerip, Ukrayınanıñ «işğalden azat etüv areketleri» sebebinden suv yedeklerini azırlamağa çağırdı. Podolâk, Ukrayına prezidentiniñ ofisi işğal etilgen Qırım sakinleri içün tahliye marşrutlarını azırlay, dep bildirdi.
Qırımnıñ Rusiye akimiyeti böyle beyanatlarnı «aselet yapılğan» dep, «qırımlılar çalışa, oquy, mahsus arbiy operatsiyada (Rusiye Federatsiyası Ukrayınağa qarşı cenkni böyle adlandıra – QA) iştirak ete ve bir yerge ketmeycek», dep bildire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
