Qırımda bir qaç künden berli yarımada şarqında yağğan yağmurlar sebebinden tahminen yüz ev ve eki yüz topraq damartısını suv bastı. Bu aqta Qırımnıñ Rusiye ükümetiniñ yolbaşçısı Yuriy Gotsanük Instagram saifesinde bildirdi.
«Keriç şeer okrugı ve Yedi Quyu rayonında meskün yerler, içtimaiy emiyetli obyektler, sağlıq obyektleri ve mesken evlerini suv basuv ihtimali yüksek qala. Neticede üç belediyeniñ dört meskün noqtasında telükeli meteorologik adiseler neticesinde 98 ev ve 198 azbarnı suv bastı», – dep yazdı o.
Gotsanükniñ malümatına köre, bu vaziyette 26 vaqtınca tutuv noqtası azırlanıldı.
«Avgustnıñ 13-nde üç azbarda suv qala: biri Yedi Quyu rayonınıñ Köp Kenegez (Krasnogorka) köyünde, eki danesi Keriçte ve Keriçteki 50 yıllıq Oktâbr stadionı», – dep qoştı Yuriy Gotsanük.
Qırımda avgustnıñ 10-ndan 12-ne qadar yağğan küçlü yağmurlar neticesinde 95 mustaqil evni ve 192 azbarnı suv bastı, dep bildirdi Qırımnıñ Rusiye ükümetiniñ yolbaşçısı Yuriy Gotsanük.
Qayd etmeli ki, sinoptikler raatlıq künleri Qırım şarqında yañı boranlı yağmurlar yağacaq, dep tahmin ete.
Keriçte Gluhov soqağındaki 40 ev suv basuv telükesi altında buluna.
Qırımnıñ Yedi Quyu rayonında sağanaqlar neticesinde Melek Çeşme özenine kirgen Qıdırlez özeni suv toldı. Qırım.Aqiqat mühbiriniñ bildirgenine köre, Qıdırlez özeniniñ furtunalı aqımı Keriç tarafına kete. Yedi Quyu rayonındaki Qıdırlez özeni şeer stadionı rayonında Melek Çeşmege kire.
Keriç yolbaşçısı vazifelerini vaqtınca eda etken Svâtoslav Brusakov Keriçniñ alçaq rayonlarında yaşağan sakinlerni tahliyege azır olmaq kerek, dep tenbiledi.
Daa evel berilgen malümatqa köre, Qırımnıñ şarqındaki Köp Kenegez (Krasnogorka) köyünde sağanaqlar neticesinde 170 azbarnı suv bastı.
Qırımdaki Rusiye Fevqulâde vaziyetler nazirliginiñ idaresi avgustnıñ 13-ne, 14-ne furtuna ihtarını ilân etti – yarımada şarqında ava bozulacaq, dep tahmin etile.
Qırımlı sinoptiklerniñ malümatına köre, şarqiy Qırımnıñ yaoısında avgustnıñ 13-nde eki metrlik dalğalar olacaq.
«Fobos» Rusiye ava merkeziniñ mütehassısı Yevgeniy Tişkovetsniñ bildirgenine köre, Qırımda sağanaqlar sebebinden «Nuh tufanı» beklenile.
