Rusiye baş naziri Mihail Mişustin yarımadanıñ «yahşı suv teminlevini temin etmek içün» Qırımğa 2,3 mlrd ruble ayırılacağına dair emirni imzaladı, dep haber ete Rusiye ükümetiniñ matbuat hızmeti.
«Qısqa müddet içinde Qırım Cumhuriyeti rayonlarınıñ sakinlerine içme suvınıñ berilmesini temin etmege imkân eter, dep ümüt etemiz», – dep bildirdi Mişustinniñ aytqanlarını müessiseniñ matbuat hızmeti.
Qayd etilgenine köre, 940 mln Qırımnıñ Cenübiy yalısında tonnel suv borusınıñ rekonstruktsiyası, 1,36 mlrd Aqmescit rayonındaki suv borusınıñ tamirine ketecek.
Hatırlatamız, iyülniñ 30-nda Mihail Mişustin Rusiye ükümeti Qırımnı suvnen temin etmek içün 2 mlrd rubleden çoq berecek, dep bildirdi.
Rusiye akimiyeti Azaq deñizi altında suv qıdırmaq içün daa 300 million ruble sarf etmege niyetlene.
Rusiye ükümeti 2021 senesiniñ soñundan başlap yañı quyularnı qazmaq, suv hatlarını tamir etmek içün milliardlarnen ruble sarf ete. Rusiye kontrolindeki Qırım memurlarınıñ esaplarına köre, ipranuv derecesi tahminen 50% ola.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
