Rusiye ükümetiniñ qararı derc etilgen soñ yazda suv basuvları neticesinde zarar körgen evlerniñ tamir etilüvi içün qırımlılarğa para berecekler, dep bildirdi sentâbrniñ 14-nde Qırımnıñ Rusiye yolbaşçısı Sergey Aksenov.
Aksenov, para «eñ yaqın vaqıtta» berilecek, dep aytsa da, qırımlılar onı alacaq künni aydınlatmadı.
«Suv basqan evlerniñ tamirine bir metr kâre içün 6 biñ ruble berilecek. Keçken afta bu mesele Rusiye ükümetiniñ reis muavini Marat Husnullinnen muzakere etildi, vaziyet ayrı kontrol etile», – dep yazdı Aksenov Facebook saifesinde.
Rusiye kontrolindeki Qırım baş naziri Yuriy Gotsanük Keriç ve Yedi Quyu rayonında avgust ayında suv basuvından zarar körgen sakinlerge 30 mln ruble berilecegine dair qararnı imzaladı.
Bundan evel berilgen malümatqa köre, Rusiye ükümeti yazda Keriç ve Yaltada selden zarar körgen azbarlarğa 930 mln ruble berecek.
Fevqulâde vaziyetler nazirliginiñ matbuat hızmeti bildirgenine köre, avgust ayında Keriçte olğan suv basuvınıñ ziyanı 2 mln rubleden çoq oldı.
