Qırımdaki işbirlikçiler arasında qırımtatar halqınıñ vekilleri bar, amma pek az, dep bildirdi Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva«Leşçenko soray» programmasında.
Onıñ bildirgenine köre, olarnıñ arasında Meclisniñ sabıq reberleri Remzi İlyasov ve Zaur Smirnov bar ediler. "Rusiye akimiyeti olarnı qullanıp attı. Şimdi Qırımdalar, amma «akimiyette» degiller», – dep qayd etti memur.
«Qırımtatar halqınıñ vekili olaraq işbirlikçilerni millet mensüpligine köre ayırmadım. Amma devletimizni satqan er kes cezasını alacaq», – dep qoştı Taşeva.
Memurnıñ aytqanına köre, yarımadada yaşağan er kes taqip etilecek demek degil. «Er kes işbirlikçi degil. İnsanlar Rusiye pasportını alğan olsa bile, olarnı vatandaşlarımız olaraq qabul etemiz, bunı işğal etilgen topraqta yaşamaq içün yapmağa mecbur ediler», – dep ayttı memur.
Taşeva bildirgenine köre, Ukrayına tarafı qadı, propagandacı, din adamları, Keriç köprüniñ qurucılığına alâqası olğanlarnıñ sanktsion cedveller üzerinde çalışa.
Ukrayına prezidentiniñ Qırım Muhtar Cumhuriyetindeki vekili Tamila Taşeva «Qırım işğalden azat etilgen soñ Ukrayınanıñ ilk vazifelerinden biri yarımadanıñ Rusiye işğaline yardım etkenlerni tapıp cezalandırmaq olacaq», dep bildirgen edi. Onıñ aytqanına köre, insanlıqqa qarşı ve cenk cinayetlerini yapqanlar, insan aqlarını bozğan ve genotsid dep sayılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
