Rusiye devlet kütleviy haber vastaları ve Kreml tarafdarları blogerler sentâbrniñ 10-nda ukrayın yırları yanğırağan toy keçken Bağçasaraydaki «Arpat» eestoran saibiniñ «afu» videosını derc etti.
«Millet» Rusiye devlet telekanalı derc etken videoda adam toyda yanğırağan «yañlış, yaramay muzıka» içün afu soray. Bundan ğayrı, o, Rusiye prezidenti Vladimir Putin ve Qırımnıñ Rusiye yolbaşçısı Sergey Aksenovğa «keçirgen mahsus operatsiya» içün (Rusiye akimiyeti Ukrayınağa qarşı cenkini böyle adlandıra – QA) qoltutqanını ayttı. O, Ukrayınağa qarşı cenkte iştirak etken Rusiye arbiylerine maddiy ceetten qoltutmağa azır, dep bildirdi. Videoda adam adını aytmay. Kremlge qoltutqan bloger Aleksandr Talipovnıñ malümatına köre, restoran saibiniñ adı Eldar Kaçkarov.
«Krım 24» Rusiye devlet telekanalınıñ malümatına köre, eñ büyük ceza – 15 kün apis cezası – toy keçirilgen Bağçasaraydaki «Arpat» restoranınıñ saibi aldı. Toy çalğıcısı ve bir musafiri 10 künge apiske alındı, kiyevniñ anası 5 künge apiske alındı, kelinniñ anası ve «Arpat» saibiniñ ömür arqadaşı 50 biñ ruble para cezalarını aldı, çünki çağına yetmegen balaları bar.
Qırım.Aqiqat bildirgenine köre, Rusiye polisi Bağçasaray sakini Elvira Abdullayevağa qarşı eki protokol tizdi. O, Ukrayına yırları yanğırağan «Arpat» qavesinde keçirilgen toynıñ kiyev tarafı ola.
Bağçasaraynıñ Rusiye akimiyeti sentâbrniñ 10-nda Ukrayına yırları yanğırağan «Arpat» restoranını teşkere, dep bildirildi.
Bundan ğayrı, Rusiye Telegram kanalları Bağçasaraydaki toyda Ukrayına yırını qoyğan çalğıcı Ahtem Gemeciniñ açıq «afu» videosını derc etti.
Qırımlı Rusiye tarafdarı bloger Aleksandr Talipov Telegram kanalında, onıñ malümatına köre, sentâbrniñ 10-nda Bağçasaraydaki «Arpat» restoranında keçirilgen toynıñ videosını paylaştı. Videoda musafirler «Çervona kalına» ukrayın yırı yanğırağanda oynay. Talipov Aqmescitteki diger toynıñ da videosını paylaştı, anda «Eurovisionda» ğalebe qazanğan Kalush Orchestra taqımınıñ Stefania türküsi yanğıray.
Qırımda ukrayın yırlarınıñ icra etilüvi sebebinden ilk taqip degil. Bu yıl avgust ayında Qırımdaki Rusiye mahkemesi Şçelkino şeerindeki «Krab» qavesinde YARMAK ukrayın reperiniñ «Dıke pole» yırını qoyğanı içün dicey Yuriy Radionovğa 40 biñ ruble para cezasını ve 10 kün apis cezasını berdi. Onıñ aytqanına köre, ukrayın yırını qave musafirlerinden biri sımarladı, onıñ mündericesini bilmey edi. Daa soñra Rusiye mahkemesi «Dıke polenı» sımarlağan Dmitriy Gaynğa 50 biñ ruble para cezasını berdi.
Bundan evel kütleviy haber vastaları ukrayın yırı qoyulğanı içün dicey ve qave musafiriniñ «qabaatını tanuv» videosını derc etti. İçtimaiy ağlarda olğan videoda «Krab» qavesinje «Dıke pole» klipi kösterile. O, «Ukrayına Silâlı quvetleri yaşasın», dep yazıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
