Qırımnıñ İslâm Terek rayonındaki poligonda çıqqan yanğın sebebinden Qırımnıñ Rusiye akimiyeti eali tahliyesini ilân etti.
«İslâm Terek rayonındaki poligonğa yaqın yerden dört mesken yerniñ sakinlerini vaqtınca tahliye etmege planlaştırıla – 2 biñden çoq insan. Operativ ştab çalışa, hızmetler çalışa», – dep aytıla Qırımnıñ Rusiye yolbaşçısı Sergey Aksenovnıñ haberinde.
Kriniçki, Şeyh Mamay (Ayvazovskoye), Orcaq Cabu (Abrikosovka) ve Cuma Eli (Privetnoye) köyleri aqqında aytıla. İnsanlarnı eñ az bir künge çıqaralar.
Tahliye etilgenler Curçı ve İslâm Terek mekteplerine yerleştirilecek.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
