İşğal etilgen Qırımda 2023 senesiniñ başından çeşit rayonlarda 30-dan çoq patlav oldı. Bu aqta BlackSeaNews neşiriniñ baş muarriri Andriy Klımenko bildirdi.
«BlackSeaNews monitoring gruppası ve Qara deñiz strategik tedqiqatlar institutı 2023 senesi yanvarniñ 1-nden başlap Qırım yarımadasında açıq menbalarğa köre yarımadanıñ farqlı rayonlarında 30-dan çoq «pamuq» oldı. 24-ü şübhesiz uçucısızlarnıñ ücümi dep adlandırıla bile. 12 «pamuq» Aqyar rayonında qayd etildi», – dep aytıla haberde.
Ukrayın tilinde patlav sözü pamuqnen aynı yazıla ve patlav sözüniñ manasını da taşıy.
Aprelniñ 29-na keçer gecesi Aqyarnıñ Kazaçya körfezinde cermay bazası yandı, dep bildirdi Qırım.Aqiqat mühbiri. Onıñ aytqanına köre, yanğın pek küçlü edi, tuman tek saba dağıldı. Gece saat ekilerde atış sesleri eşitildi.
Şeerniñ Rusiye yolbaşçısı Mihail Razvojayev yanğınnıñ sebebi uçucısızlarnıñ ücümi oldı, dep bildire. Onıñ aytqanına köre, yerli sakinler içün bir telüke yoq, yanğında kimse yaralanmadı. Kimse tahliye etilmeycek, amma adise civarlarında zeerli madde ölçüsi yapılacaq.
Mayısnıñ 1-nde Qırımnıñ Rusiye yolbaşçısı Sergey Aksenov yarımadanıñ ğarbinde Rusiye ava mudafaa sisteması uçucısıznı urıp tüşürdi, dep bildirdi. Uçucısız kimge ait memur aytmadı. Ukrayına arbiyleri adiseni izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayıina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
