Qırımda avgustnıñ 10-ndan 12-ne qadar yağğan küçlü yağmurlar neticesinde 95 mustaqil evni ve 192 azbarnı suv bastı, dep bildirdi Qırımnıñ Rusiye ükümetiniñ yolbaşçısı Yuriy Gotsanük.
«Üç belediyeniñ dört meskün yerinde telükeli meteorologik adise neticesinde 95 mustaqil evni ve 192 azbarnı suv bastı: Sudaq şeer okrugınıñ Toqluq (Bogatovka) köyünde bir mustaqil ev ve eki azbar, Aqmescit rayonınıñ Tavel (Krasnolesye) ve Mamut Sultan (Dobroye) köylerinde dört mustaqil ev ve 19 azbar, Yedi Quyu rayonınıñ Köp Kenegez (Krasnogorka) köyünde 90 mustaqil ev ve 170 azbar», – dep bildirdi Gotsanük avgustnıñ 12-nde aqşam fevqulâde vaziyetni yoq etüv müessiselerara ştabınıñ toplaşuvından soñ.
Onıñ malümatına köre, avgustnıñ 12-nde saat 21:30-da dört yerli ev (dört mağaz) ve 12 azbar suvda qalğan edi.
«90 evden ve 158 azbardan suv özü ketti», – dep bildirdi Gotsanük.
Daa evel berilgen malümatqa köre, Qırımnıñ şarqındaki Köp Kenegez (Krasnogorka) köyünde sağanaqlar neticesinde 170 azbarnı suv bastı.
Qırımdaki Rusiye Fevqulâde vaziyetler nazirliginiñ idaresi avgustnıñ 13-ne, 14-ne furtuna ihtarını ilân etti – yarımada şarqında ava bozulacaq, dep tahmin etile.
Qırımlı sinoptiklerniñ malümatına köre, şarqiy Qırımnıñ yalısında avgustnıñ 13-nde eki metrlik dalğalar olacaq.
«Fobos» Rusiye ava merkeziniñ mütehassısı Yevgeniy Tişkovetsniñ bildirgenine köre, Qırımda sağanaqlar sebebinden «Nuh tufanı» beklenile.
