Rusiye Mudafaa nazirligi «mahsus arbiy operatsiyada» (Rusiye Federatsiyası Ukrayınadaki cenkni böyle adlandıra – QA) iştirak etkenleri içün mukâfat alğan arbiyler ve diger qurulışlarnıñ hadimlerine Qırımda ve Moskva civarında topraq damartılarını bermege teklif etti. Buyruq leyhası Rusiyeniñ uquqiy malümat portalında derc etildi.
Vesiqada Moskva vilâyetiniñ icra akimiyet organlarına, işğal etilgen Aqyarnıñ ve Qırımnıñ Rusiye akimiyetine «vatandaşlarnıñ topraq damartılarını bedava aluv aqqını belgilegen qanuniy aktlarnı qabul etmege» teklif etile.
Rusiye Mudafaa nazirliginiñ bildirgenine köre köre, topraq aqqı devlet mukâfatlarını alğan ve cenkte faydalı olğan ve cenk uruşlarınıñ veteranlarına berilmeli.
Rusiyeniñ Ukrayınağa qarşı cenki başlağan soñ Rusiyede cenk uruşlarınıñ iştirakçileri olaraq tanılacaq şahıslar cedveli kenişletildi. Arbiylerden ğayrı, Rusiye FSBsiniñ hadimleri, «silâlı provokatsiyalarğa yol bermegen» ve vatandaş mütehassısları – meselâ, Ukrayınada «vazife» yapqan ekimler ve qurucılar, dep bildire «Mediazona» Rusiye neşiri.
Ukrayınadaki cenk areketleriniñ iştirakçileri «Veteranlar» qanunına ve belli imtiyazlarına tabiiydir: bergi, naqliyat, topraq, içtimaiy qoltutuv, mesken ödev imtiyazları, kira ve kommunal ödevler. Rusiye aliy oquv yurtları bu yıldan başlap cenk uruşları iştirakçileriniñ balalarını imtiansız qabul etecek.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
