Qırımda ve Aqyarda keçken sene dekabr ayında Keriç boğazında yüz bergen Rusiye tankerleriniñ qazasından soñ kirlengen bir buçuq biñ tonnadan ziyade mazutnen kirlengen qum ve topraq toplandı. Bu aqta aprelniñ 1-nde Rusiyeniñ Fevqulâde vaziyetler nazirliginiñ matbuat hızmeti içtimaiy ağlardaki saifelerinde bildirdi.
«Qırımda: yalınıñ 525,4 kilometri baqıla; yalınıñ 232,1 kilometriden ziyade temizlendi; umumen kirlengen 796 tonna qum ve topraq toplandı. Aqyarda: yalınıñ 165 kilometri teşkerile; umumen 842,4 tonna kirlengen qum ve topraq toplap çıqarıldı», – dep aytıla haberde.
Rusiye müessisesi haber etkenine köre, dalıcılar üç biñden ziyade metr kâre deñiz tübüni teşkerdi. Olarnıñ malümatına köre, Aqyarda ve Mamaşay (Orlovka) yalısında mazut tapımalğan.
«Rusiye Fevqulâde vaziyetler nazirliginiñ dalıcıları Aqyarnıñ yalı alanını teşkere. Mamaşay köyüniñ yalısında mazut izleri qayd etilmedi. İşler başlağanından Rusiye Fevqulâde vaziyetler nazirliginiñ dalıcıları suvastı toprağınıñ 3 biñden ziyade metr kâresini teşkerdi», – dep qoştı Rusiye Fevqulâde vaziyetler nazirligi.
Qırım.Aqiqat bildirgenine köre, mazut taşığan eki «Volgoneft» tankeri bazar künü, dekabrniñ 15-nde, resmiy malümatqa köre, furtuna sebebinedn Keriç boğazında battı.
Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.
Rusiye Deñiz qurtaruv hızmeti Keriç boğazında dekabrniñ 15-nde tankerlerniñ batması neticesinde Qara deñizge 2,4 biñ tonna cermay aqıp ketti, dep bildirdi.
Qırımnıñ Rusiye yolbaşçısı Sergey Aksenov Qırımda mazut çıqaruvları ile bağlı vaziyet, tahminlerge köre, daa beterleşe bilecegini, buzlav ölçüsiniñ Rusiyeniñ Krasnodar ülkesiniñ yalı boyunda qayd etilgen seviyege çıquv telükesi yüksek olğanını bildirdi.
Ukrayina ekologiya nazirligi tanker qazasından soñ mazutnıñ tökülüvi planktonnıñ ölümine, balıqlar, deñiz quşları ve diger canlı organizmlerniñ zeerlenmesine, deñiz nebatatı ve ayvanatınıñ yaşağan yeri olğan tüp çökündileri ve yalı boyu alanlarınıñ kirlenmesine ketirecegini bildirdi. Müessise esaplağanına köre, felâketten Qara deñizniñ ekosistemasına 14 mlrd dollardan ziyade zarar ketirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
