Link açıqlığı

Saatnıñ esas haberi

Qırımda ve Aqyarda 600 tonnadan ziyade mazutnen bulaşqan qum ve topraq toplandı, 500 tonnadan az çıqarıldı – Rusiye nazirligi


Keriç boğazında Rusiye tankerleri batqan soñ göñülliler Keriç yalısında mazut toplay
Keriç boğazında Rusiye tankerleri batqan soñ göñülliler Keriç yalısında mazut toplay

Qırımda keçken sene dekabrniñ 15-nde Keriç boğazında eki cermay taşıyıcı tanker batqan soñ mazutnen bulaşqan 430 tonna qum ve topraq toplandı. Aqyarda tankerler qazası kününden berli 173 tonna toplandı, 158,8 çıqarıldı, dep haber ete yanvarniñ 14-nde Rusiye Fevqulâde vaziyetler nazirligi.

«Qırımda Keriçten Portovoye köyüne qadar 511 kilometr yalı boyu teşkerildi; 178 kilometrden ziyade yalı boyu temizlendi, em de tekrar; episi olıp 430 tonnadan ziyade kirli qum ve topraq toplandı; 318 tonnadan ziyade çıqarıldı. Aqyarda Laspi ve Andreyevka arasındaki yalınıñ 165 kilometri teşkerildi, em de tekrar; 5 esas iş alanı belgilendi; 173 tonnadan ziyade kirli qum ve topraq toplandı; 158,8 tonnadan ziyade çıqarıldı», – dep qayd etile müessiseniñ haberinde.

Qırım.Aqiqat bildirgenine köre, mazut taşığan eki «Volgoneft» tankeri bazar künü, dekabrniñ 15-nde, resmiy malümatqa köre, furtuna sebebinedn Keriç boğazında battı.

Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.

Rusiye Deñiz qurtaruv hızmeti Keriç boğazında dekabrniñ 15-nde tankerlerniñ batması neticesinde Qara deñizge 2,4 biñ tonna cermay aqıp ketti, dep bildirdi.

Qırımnıñ Rusiye yolbaşçısı Sergey Aksenov Qırımda mazut çıqaruvları ile bağlı vaziyet, tahminlerge köre, daa beterleşe bilecegini, buzlav ölçüsiniñ Rusiyeniñ Krasnodar ülkesiniñ yalı boyunda qayd etilgen seviyege çıquv telükesi yüksek olğanını bildirdi.

Ukrayina ekologiya nazirligi tanker qazasından soñ mazutnıñ tökülüvi planktonnıñ ölümine, balıqlar, deñiz quşları ve diger canlı organizmlerniñ zeerlenmesine, deñiz nebatatı ve ayvanatınıñ yaşağan yeri olğan tüp çökündileri ve yalı boyu alanlarınıñ kirlenmesine ketirecegini bildirdi. Müessise esaplağanına köre, felâketten Qara deñizniñ ekosistemasına 14 mlrd dollardan ziyade zarar ketirildi.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG