Rusiye kontrolindeki Seyitler rayon mahkemesinde bazarertesi künü, aprelniñ 5-nde, vatandaş jurnalisti, «Qırım birdemliginiñ» strimeri Ayder Kadırovnıñ davası boyunca oturışuvda şaat olaraq advokat Aleksey Ladin sorğuğa çekildi. Bu aqta «Qırım birdemligi» cemaat birleşmesi haber ete.
Kadırov tutulğan künü menfaatlarını temsil etken Ladin vatandaş jurnalisti FSBde sorğuğa çekilgende şeker hastası olğanına baqmadan aşatılmadı, dep bildirdi.
«Ayder Kadırovnen ancaq FSB basqısı altında qabaatnı boynuna alıp kelgen soñ (Ladin – QA) körip oldı. Hadimler vesiqanı imzalamasa, aş bermezler, dep aytqanlar. Onı soñra advokatnen beraber şikâyet etti. İmayeci, Ayder Kadırovğa qarşı bütün tahqiqat tedbirleri tahqiqatçı statusını belgilemezden evel keçirildi», – dep aytıla haberde.
Mahkeme oturışuvı vaqtında imaye tarafı Ayder Kadırovnıñ 1 tip şeker diabeti olğanını isbatlağan vesiqalarnı berdi – oña künde 4 ine insulin yapılmalı ve diyet yapmalı, psihologik stress oña büyük zarar ketire. Advokat Lilâ Gemeciniñ aytqanına köre, bu vesiqalar imaye tarafınıñ munaqaşa temeli olacaq.
İmaye, Aleksey Ladinniñ FSB tahqiqatçısı Şerstükov ile yazışmasınıñ skrinşotlarını da dava malümatlarına qoşmağa rica etken edi. Anda advokat Kadırovnıñ şeker hastası olğanını aytıp, aşsız qaldıruv onıñ içün işkence sayıla, dep yaza. Faqat mahkeme imayeniñ muracaatını qanaatlendirmedi.
Mahkeme, Umicon Dadaconovnıñ bulunğan yerini ve vaziyetini bilmek içün FSBge berilgen muracaatqa qol tuttı.
«İmaye añlata – bu cinaiy davanı toqtatmaq içün kerek, çünki Dadaconovnıñ vefat etkenini aytmaq içün sebep bar. Bu malümat isbatlansa, oña qarşı dava qapatılacaq», – dep bildire «Qırım birdemligi».
Nevbetteki mahkeme oturışuvı aprelniñ 9-na planlaştırıla.
2021 senesi yanvarniñ 25-nde Rusiye kontrolindeki Qırımnıñ Seyitler rayon mahkemesi vatandaş jurnalisti, «Qırım birdemliginiñ» strimeri Ayder Kadırovnıñ imayesi bergen cinaiy davanı qapatuv muracaatını red etti. Kadırov Rusiye Ceza kodeksiniñ 205.6 maddesine istinaden qabaatlana – «Cinayet aqqında haber etmeme».
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñevinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Avgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Sentâbrniñ 3-nde Aleksey Ladinniñ bildirgenine köre, tahqiqatçı ondan ve müvekkili Kadırovdan ilk tahqiqat malümatını aydınlatmama vesiqasını tutıp almağa tırıştı, amma red cevabını aldı.
Ayder Kadırov sentâbrniñ 10-nda 2020 senesi avgustnıñ 31-nde Qırımdaki Rusiye FSBsiniñ hadimleri tarafından tutulğanını izaatladı.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
