Tezden Qırımda Ukrayına ve qırımtatar bayraqları köterileceginden şübhemiz yoq, dep bildirdi Qırımtatar Milliy Meclisiniñ reisi Refat Çubarov.
Onıñ aytqanına köre, yarımada işğalden azat etilgen soñ altın tamğalı kök bayraq bütün dünya içün qırımtatar halqınıñ boysunmama ve cesaret, aqları ve Qırımda Ukrayına devlet suverenitetiniñ ğayrıdan tiklenmesi oğrunda küreşiniñ timsali oldı.
«Ukrayına telükesizlik ve mudafaa quvetleriniñ arbiyleri, göñülliler, Ukrayına cemiyeti, işğal etilgen Qırımda ve Rusiye apishanelerinde Rusiye işğalcilerine tirengen Ukrayına vatandaşları sayesinde tezden azat etilgen Qırımda kene Ukrayına devlet bayrağı ve qırımtatar milliy bayrağı köterilecek», – dep qayd etti Çubarov.
Meclis reisi qırımtatar milliy bayrağı birlik, maneviy bağ ve qırımtatar halqınıñ azatlıq oğrunda küreşini köstergen timsal ola, dep qoştı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
