Link açıqlığı

Saatnıñ esas haberi

İşğal başlanğanından berli Qırımda 600-den ziyade ukrayin tilli sınıf ve 7 mektep yoq etildi – QURŞ vekili


Andriy Şçekun
Andriy Şçekun

Qırım ukrayinleri regional şurasınıñ vekili, «Qırım platforması» ekspert ağınıñ «Gumanitar siyaset» gruppasınıñ koordinatorı Andriy Şçekun Qırım işğali başlağanından 600-den ziyade ukrayin tilli sınıf ve 7 mektep yoq etildi, dep bildirdi.

Bunı Şçekun «Suspilne. Studiya» yayınında «İşğal etilgen Qırımnıñ devlet tilinde tasil alma aqqınıñ bozuluvı» mevzusında tögerek masadan soñ ayttı.

«2014 senesinden başlap Qırımda 600-den ziyade ukrayin tilinde oqutqan sınıf ve 7 mektep yoq etildi. Ukrayina tasili, medeniy merkezler yoq etildi. Bu cinayetlerni tasdıqlağan eki esas halqara qarar bar», – dedi Şçekun.

Onıñ aytqanına köre, al-azırda mevcut vaziyetke alâqası olğan Qırımdaki tasil saasında Rusiye memurlarına qarşı cinaiy dava açmaq içün sekiz ariza berildi.

«Bugünge qadar Ukrayinağa qarşı siyaset alıp barğan işğalci tasil naziriniñ muavinlerine qarşı cinaiy dava açmaq içün sekiz ariza berdik. Bu cedveller toldurılacaq, çünki qabaatlılar daa çoq», – dep qoştı Şçekun.

Keçken sene noyabrniñ 21-nde «Almenda» vatandaşlıq tasili merkeziniñ yolbaşçısı Mariya Sulâlina «Tuzaqtaki balalıq: işğalge oğrağan balalarnıñ aqlarını nasıl qorçalamaq mümkün» adlı matbuat konferentsiyasında 2023-2024 oquv yılında Qırım mekteplerinde ukrayin tilini ögrenüv imkânı balalarnıñ tek 0,8%-ında bar edi, dep ayttı.

2024 senesi noyabr ayınıñ soñunda Aqyar orta mekteplerinde balalar ukrayin tilini ögrenüvini toqtatqanları aqqında haber keldi. Bu malümat Aqyar şeeriniñ Rusiye tasil ve ilim idaresiniñ Aqyar ukrayin milliy medeniy cemiyetiniñ (UNKOS) yolbaşçısı Oleg Leusnıñ malümat ricasına bergen cevabından peyda oldı.

Keçken sene oktâbrniñ soñunda Ukrayina prezidentiniñ Qırım Muhtar Cumhuriyetindeki temsilciligi Qırım mekteplerinde 249 bala ukrayin tilinde oquğanı aqqında bildirgen edi, bu Qırım yarımadasında bütün talebelerniñ 0,2%-ı ola.

Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG