Qırımda turistlerniñ sayısı 25-30% eksildi, hususan patlavlar ve Qırım (Keriç) köpründe olğan tıqanıqlıqlar sebebinden, dep aytı «Kommersant» Rusiye neşirine Rusiye turoperatorları birliginiñ reis muavini Sergey Romaşkin.
Yılnıñ sekiz ayına köre yarımadanı 3,7-3,9 mln insan ziyaret etecek, dep tahmin ete o.
«Alean» Rusiye turoperatorı jurnalistlerge Qırımda bu yaz kiralav eki qat eksildi, dep bildirdi, lâkin tam raqamlar aytılmadı.
Ostrovok servisiniñ malümatına köre, yarımadada mevsim vaqtında raatlanmağa istegenlerniñ sayısı 50-60% eksildi. «Tvil» bildirgenine köre, Aqyarda kiralav sayısı 66%, Kezlevde ise 69% eksildi. Böylece ortalama gece fiyatı 21% eksildi.
Romaşkin qayd etkenine köre, bu raqamlar turistik biznesniñ beklegenlerini qarşılamadı, bu yıl yanvar ayından mayıs ortasına qadar kurort raatlıq istekleri yıl-yıldan 30-40% artqan edi.
Rusiye Federal deñiz ve özen naqliyatınıñ agentligi bildirgenine köre, Keriç parom keçitiniñ 10 aylıq işi vaqtında, 2022 senesi oktâbrniñ 8-nden 2023 senesi avgustnıñ 6-na qadar, eki tarafqa boğazdan 243002 yolcu ve 170078 yük maşinası keçti. Paromlar umumen 5110 sefer kerçekleştirdi.
Bu yıl iyül ayında Qırımnıñ Rusiye naqliyat nazirligi Rusiyeden turist avtobusları Qırımğa ve Qırımdan Ukrayına cenübinde işğal etilgen diger vilâyetlerden «alternativ yoldan» ketecek, dep bildirdi.
İyülniñ 17-nde Aksenov Keriç (Qırım) köpründe areket toqtatıldı, dep bildirdi. Onıñ aytqanına köre, Krasnodar ülkesi tarafından 145-inci istinat yerinde fevqulâde vaziyet oldı.
Rusiye Naqliyat nazirligi köpür yolu zarar kördi, dep bildirdi. Telegram kanalları patlavlar aqqında yazıp, zarar körgen arabanıñ fotoresimlerini paylaşa. Rusiye tarafdarı bloger Aleksandr Talipov eki patlav aqqında yazdı – 3:04-te ve 3:20-de.
Belgorod vilâyetiniñ valisi Vâçeslav Gladkov bir qoranta çifti elâk oldı, dep bildirdi. Arabada 14 yaşında qızları da bar edi.
Ukrayına Mudafaa nazirliginiñ Baş istihbarat idaresiniñ spikeri Andriy Yusov Keriç köpründeki «fevqulâde adiseni» izaatlamağa istemedi. «Tek Ukrayına Mudafaa nazirligi Baş istihbarat idaresiniñ reberi Kırılo Budanovnıñ «Qırım köprü – artqaç bir inşaat» degen laflarını tekrarlamaq mümkün», – dep ayttı o, «Suspilne» izaatlarında.
RBK-Ukrayına menbalarına esaslanıp, Qırım köpründe olğan zararlar – Ukrayına Silâlı quvetleri ve Telükesizlik hızmetiniñ Arbiy-deñiz quvetleriniñ mahsus operatsiyasıdır, dep bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
