Rusiye uquq qoruyıcılarınen işbirligi yapqan Rusiye tarafdarı qırımlı bloger Aleksandr Talipov Rusiyeniñ tam istilâsınıñ yılında Instagramda Ukrayınağa qoltutuv paylaşuvını yapqan tiş ekimi Elfan Beytullayevniñ afu videosını derc etti.
Videoda Beytullayev bu yıl fevralniñ 24-nde «Rusiye Federatsiyasınıñ Silâlı quvetlerini itibardan tüşürgen» fotoresimni derc etti, dep ayta.
«Qabaatlı olğanımnı tanıp, ileride böyle bir şey paylaşmaycam, dep söz berem, afu sorayım», – dep ayta Beytullayev videoda.
Talipov, Beytullayev Rusiye ordusını «itibardan tüşürgeni» içün 30 biñ ruble para cezasını aldı, dep bildire. O, tiş ekimini işsiz qaldırmağa çağıra.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
