Oña qarşı «qanunsız missionerlik faaliyeti» içün memuriy protovol tizildi. Lenur Yakubovdan daa bir haber yoq.
Polis bölüginden çıqqan Sayfullin «halq imamı», yani Eski Qırım camilerinden birinde halq saylağan imam ola, dep ayttı. Rusiye uquq qoruyıcılarınıñ malümatın köre, Sayfullinden yanvarniñ 19-nda Cuma namazını qıldırğanı içün şikâyet etildi. «Qanunsız missionerlik faaliyetini kerçekleştirgen» eken, çünki caminiñ vesiqaları bar, anda cami imamı olaraq başqa adam qayd etilgen.
Fevralniñ 29-nda saba Eski Qırımda ve Seyit Eli (Juravki) köyünde Rusiye uquq qoruyıcıları dört qırımtatarı Lenur Yakubov, İzet Sayfullin, İdris Yurdamov ve Şevket Kiyamovnıñ evlerinde tintüv keçirdi. Eski Qırım camisi de tintildi.
Tintüvlerden soñ Eski Qırımlı faal ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfullin tutuldı. İdris Yurdamov ve Şevket Kiyamovnı uquq qoruyıcılar evlerinde qaldırdı.
Soñra Yurdamov onı qanunsız missionerlik faaliyetinde qabaatladılar, amma o, razı degil, dep tarif etti.
«Halq saylağan imamımız İzet Sayfullin bar. İnsanlar memnün, İslâm talaplarına uyğun ve Cuma namaz keçirilüvinen bağlı bir problem olmadı. Bu organdaki şahıslar kirişmege aqları bar, dep tüşüneler. Eki aftadan berli cami Qırım musulmanları diniy idaresine ait olaraq qayd etilgenini bildirgenler, amma razılığımız yoq. Kimseniñ haberi de yoq – ne cemiyet, ne de mında yaşağan şeer sakinleri bile. Artıq tayin etilgen imamdan ğayrı kimse namaz qıldıramaz, dep aytalar. Yarın Cuma namazına polis hadimlerinen beraber kelecek, dep aytqanlar, yañı imamnı qoruycaqlar», – dedi Yurdamov.
Aq qorçalayıcılar bildirgenine köre, tintüvlerden soñ tutulğan Lenur Yakubov ve İzet Sayfullinni İslâm-Terek qasabasındaki Rusiye Federatsiyası İç işler nazirliginiñ bölük binasına ketirgenler.
2023 senesi noyabrniñ 23-nde Rusiye uquq qoruyıcıları «Aluşta» musulman din cemiyetiniñ üç azasınıñ evini tintip tuttı. Yusuf Aşirov, cemiyetniñ eki azası Vilen Useinov ve Zinur Appazov aqqında aytıla. Aşirov eki künge, Useinov 10 künge, Appazov ise 5 künge apiske alındı.
Daa soñra Rusiye uquq qoruyıcıları «Aluşta» musulman din cemiyetiniñ reisi Abdul Gafarovnıñ evinde tintüv keçirdi, bundan soñ «Ekstremizm ile küreş merkeziniñ» hadimleri Abdul Gafarovnı Aluştadaki Rusiye polisi bölügine alıp ketti. Oña qarşı RF Memuriy cinayetler qanunnamesiniñ 20.29 maddesine istinaden memuriy protokol tizildi (Federal ekstremist materiallar cedveline kirsetilgen ekstremist materiallarnıñ kütleviy darqatıluvı, em de olarnı kütleviy darqatıluv maqsadınen azırlav ya da saqlav).
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
