2024 senesi işğal etilgen Qırımda 61 tintüv qayd etildi, 35-i qırımtatarlarnıñ evlerinde oldı. Bu aqta Qırımtatar Resurs merkeziniñ insan aqları bozuvlarınıñ talilinde aytıla.
Qayd etilgenine köre, Rusiye akimiyetiniñ areketleri Qırımnıñ razı olmağan ealisine qarşı repressiv siyaseti devam etkenini köstere.
«Bu raqam keçken seneden aman-aman eki qat az olsa da, «Hizb ut-Tahrir», «İyegova şaatları» ya da Noman Çelebicihan batalyonı kibi yasaqlanğan teşkilâtlarnen alâqaları şübhesinen kütleviy tintüvler eksilmey», – dep aytıla talilde.
Qırımtatar resurs merkezi qayd etkenine köre, tintüv keçirilüvi içün yasaqlanğan teşkilâtlarda iştirak etüv, casuslıq, ekstremizm ya da nefret tarqatıluvı sebep ola.
Tintüv vaqtında insan aqları bozula, bunı mulkke zarar, tintüv vaqtında ev saipleriniñ olmaması, yasaqlanğan edebiyatnıñ ve delil içün diger şeylerniñ gizliden qoyulmasından añlamaq mümkün.
Qırımtatar resurs merkezi bildirgenine köre, 2017 senesinden başlap Rusiye işğal etken Qırımda 10018 esas insan aqlarınıñ bozuluvı qayd etildi, 6730-ı tamır qırımtatar halqına qarşı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
