«Rayonlarnıñ blok etilüvi ve yerli sakinlerniñ teşkerilüvi vaqtınca işğal etilgen Qırımda keçirile. Böyle filtratsiya tedbirleri zapt etilgen yarımadada «işanç olmaycaq» insanlarnı tapmaq içün başlandı», – dep bildire Milliy tirenüv merkezi.
Anda arbiy talimler adı altında bunı yapalar, dep qoşula. Bundan ğayrı, Milliy tirenüv merkezi bildirgenine köre, Rusiye quvetleri böyle teşkerüvlerni Ukrayinanıñ diger işğal etilgen topraqlarında da keçire.
«Yaqında vaqtınca işğal etilgen Herson vilâyetinden çıqacaq olğan vatandaşlarnıñ kontroli sertleşti. Pasportlarını Rusiye kâğıdına deñiştirmegen ukrayinalılar aqqında aytıla», – dep qoştı Milliy tirenüv merkezi.
Qırımnıñ Rusiye yolbaşçısı Sergey Aksenov sentâbrniñ 17-nden başlap yarımadada «territorial mudafaa bölükleriniñ» talimleri keçirilecek, dep bildirgen edi. Onıñ aytqanına köre, talimlerniñ maqsadı «duşmannıñ diversion gruppalarına cumhuriyetke kirmesine mania olmaqtır». «Baquv tedbirlerinen» memuriy rayonlarnıñ bütünley blok etilüvi yapıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
