2024 senesi aq qorçalayıcılar işğal etilgen Qırımda apiste tutulğan ya da alâ daa apiste yatqan siyasiy ve diniy sebepli taqiplerniñ daa 95 yañı qurbanı aqqında malümat topladı. Bu aqta Qırım aq qorçalayıcı gruppası haber ete.
Bu yıl Qırım aq qorçalayıcı gruppası Qırımda insan aqlarınıñ bozuluvınen bağlı 150-den çoq mahkeme oturışuvını ve Rusiye ordusını «itibardan tüşürüv» maddesine istinaden 300 mahkeme qararını qayd etti.
Bundan ğayrı, ukrayinlerniñ genotsidine çağıruvlar ve Ukrayinağa qarşı agressiv cenk alıp baruv davalarında 151 şübheli aqqında malümat toplandı ve böyle çağıruvlar olğan 445 beyanat vesiqalaştırıldı.
Aq qorçalayıcılar tarafından elde etilgen deliller ve malümat milliy ve halqara tahqiqatlarda ve şahsiy sanktsiyalar kirsetmek içün qullanıla, dep añlattı Qırım aq qorçalayıcı gruppası.
İşğal etilgen Qırımda qırımtatarlarnıñ evlerinde tintüvler muntazam sürette keçirile. Uquq qoruyıcılar ve Rusiye akimiyeti olarnı «Ukrayinanen bağ» ya da «terror faaliyetinde» qabaatlaylar. Aq qorçalayıcılar ve Ukrayina akimiyeti bu qabaatlavlarnı siyasiy sebeplernen bağlı dep adlandıra.
Qırımtatar resurs merkezi bildirgeni kibi, 2017 senesinden başlap Rusiye tarafından ilhaq etilgen Qırımda 10 018 esas insan aqlarınıñ bozuluvı qayd etildi, 6 730-ı – qırımtatarına qarşı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
