İşğal etilgen Qırımda «Sarı şerit» faalleri Basman dağınıñ töpesinde Ukrayina bayrağını tikledi. Bu aqta areketniñ Telegram kanalında haber etile.
«Faallerimiz Qırımda daa bir Ukrayina bayrağını astı – bu sefer Basmannıñ töpesinde. Bu fotoresimni keç derc etemiz, amma keç olsa da, olsun. Aktsiya soñki ay devamında keçirildi – qar Qırım töpelerini örtkende», – dep yazdı faaller.
Basman – Qırımnıñ eñ yüksek noqtalarından biridir.
Faaller Aqmescit, Aqyar, Yalta, Kezlev, Kefe, Keriç, Bağçasarayda Ukrayinağa qoltutuv aktsiyalarını keçirdi. «İşğal vaqtınca bar», «Qırım – Ukrayinadır», «İşğal – bayram degil» yazıları yarımadanıñ soqaq ve meydanlarında peyda oldı.
«Levhalardan birinde – 11 yıldan berli sesi çıqmağan Aqmescitteki ukrayin telequllesi. Amma signal qaytacaq. Çünki küreş toqtamay», – dep qoştı faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve «Qırım – Ukrayinadır» sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
