Ukrayina Mustaqillik Künü munasebetinen «Sarı şerit» areketiniñ faalleri işğal etilgen topraqlarda, hususan Qırımda aktsiyalar keçirdi. Bu aqta areket Telegram kanalında bildirdi.
«Avgustnıñ 24-ü – bütün ukrayinalılar içün müim bir kün. Hususan işğalde yaşağan ve mustaqillik qıymetini yahşı añlağanlar içün. Teslim olmağan, telâşlanmağan ve er kün işğalcilerge Ukrayinanıñ sıñırları 603,7 biñ km² olğanını hatırlatqan insanlarımızdan fotoresimler köreceksiñiz», – dep aytıla haberde.
Aktsiya çerçivesinde Simeizden fotoresim derc etildi.
Areket saytını da açtı, anda vaqtınca işğal etilgen Ukrayina topraqlarınıñ sakinlerini Mustaqillik Kününinen tebrikledi.
Avgustnıñ 24-nde Ukrayina mustaqilliginiñ 34-ünci yılını qayd ete. Bayram Ukrayina Sovet Sotsialistik Cumhuriyetiniñ Yuqarı Radasınıñ 1991 senesi avgustnıñ 24-nde Ukrayina mustaqillik qararını alğanı munasebetinen belgilendi – devletniñ yañı statusını pekitken siyasiy-uquqiy vesiqa. Bu status 1991 senesi dekabrniñ 1-nde umummilliy referendum tarafından tasdıqlandı, vatandaşlarnıñ 90,32%-ı mustaqillikke qoltuttı.