Qırımda Rusiye uquq qoruyıcıları yedi saqat ve ağır hasta yarımada sakinini taqip ete, altısı azatlıqtan marum etildi, dep haber ete Qırımtatar resurs merkezi.
Qırımtatar resurs merkeziniñ malümatına köre, Rusiye uquq qoruyıcıları tarafından apishane ve SİZOda tutulğanlar,
- Zekirya Muratov – 3-ünci derece saqatı
- Aleksandr Sizikov – 1-ince derece saqatı
- Timur İbragimov – 3-ünci derece saqatı
- Servet Gaziyev – 2-nci derece saqatı
- Amet Suleymanov – 3-ünci derece saqatı
- Timur Yalkabov – 3-ünci derece saqatı
2-nci derece saqatı olğan Remzi Kurtnezirov ev apsinde tutula.
«Bu insanlar ağır hasta. SİZO ve apishanelerdeki şaraitler, sağlıq şikâyetleriniñ muntazam sürette körmemezlikke uruluvı, kerekli tibbiy yardım vaqtında kösterilmegeni sebebinden sağlıq vaziyetleri fenalaşmağa devam ete. Ve, ne yazıq ki, yaramay aqibetleri bar, 60 yaşında siyasiy mabüs, 2-nci derece saqatı Cemil Gafarov vefat etti», – dep aytıla Qırımtatar resurs merkeziniñ haberinde.
Qırımtatar resurs merkezi qayd etkenine köre, böyle areketlernen Rusiye «siyasiy mabüslerniñ yüksek bedeniy ve maneviy sağlıq aqqını» boza. Qırımtatar resurs merkezi Rusiye qanunlarına köre ağır hastalar apisten azat etilmeli, çünki insan ayatı eñ müim şey, üküm ölüm olmamalı, dep qayd etti. Şu sebepten Qırımtatar resurs merkezi Rusiyeden «bu insanlarnı ve diger siyasiy mabüslerni acele azat etmege, işğal etilgen Qırımda ise insan aqlarınıñ muntazam sürette bozuluvını toqtatmağa» talap ete.
Qırımtatar resurs merkezi bildirgenine köre, Qırım işğaliniñ 10 yılı devamında 320 mabüs qayd etildi, aq qorçalayıcılarnıñ fikirince, siyasiy sebeplerden. 217 mahkeme qararı qırımtatarlarğa qarşı çıqarıldı.
Ukrayına Prezidentiniñ Qırım Muhtar Cumhuriyetindeki Temsilciliginiñ malümatına köre, 2024 senesi fevralniñ 19-nde Rusiyede 208 qırımlı siyasiy mabüs tutula, 125-i - qırımtatarıdır.
Ukrayına prezidentiniñ Qırım Muhtar Cumhuriyetindeki temsilcisi Tamila Taşeva bildirdi ki, «Qırımnıñ işğalden azat etilmesinden soñ Ukrayınanıñ esas vazifelerinden biri - yarımadanıñ Rusiye tarafından ilhaqına yardım etkenlerni tapmaq ve mesüliyetke çekmek olacaq». Onıñ aytqanına köre, insanlıqqa qarşı cinayetlerni ve arbiy cinayetlerni yapqanlar, insan aqlarını bozğanlar ve genotsid kibi tanılğan cinayetlerni yapqanlar mesüliyetke çekilmeli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
