Qırımda Rusiye devlet adliye universitetiniñ ocası «Ukrayina akimiyeti anayasağa uyğun ve qanuniy ola» degen lafları sebebinden ders keçirmekten uzaqlaştırıldı. Bu aqta «Sarı şerit» areketi faaliniñ malümatına esaslanıp haber ete.
«Eki afta evelsi anayasa uquqı dersinde oca Ukrayina akimiyeti Ukrayina qanunlarına köre saylandı ve halqara uquq normaları tarafından tanıldı, şunıñ içün qanuniy ve anayasalı ola. Mında Tuzladan oqumağa kelgen genç tartışıp başladı. Böyle aytılmaz, bu hainlik ola dep ayttı, studentlerden kimse oña qoltutmağanına açuvlanıp, dersten çıqtı ve ocanı şikâyet etti. 2 aftadan berli bu ders yoq. Sınıf başı oca bu sebepten uzaqlaştırıldı, dep ayttı. Olmaycaq şey», – dep bildire faalniñ aytqanlarını areket Telegram kanalında.
«Er angi mefküreviy manasız aytılğan aqiqattan ateşten kibi qorqulğan «adliye» universiteti. Rusiye budır», – dep izaatladı «Sarı şerit».
2023 senesi mart ayında Rusiye kontrolindeki Aqmescitniñ Merkeziy rayon mahkemesi Qarasuvbazar tehnikumınıñ sabıq ocası Andrey Belozerovğa Rusiye ordusını tekrar «itibardan tüşürüv» maddesine istinaden 100 biñ ruble para cezasını berdi.
Belozerovnıñ 2022 senesi oktâbrniñ 9-nda yapqan ve dava sebebi olğan paylaşuvı bu edi: «8 yıl devamında Rusiye Federatsiyasınıñ Silâlı quvetleri Donbasta Ukrayinanıñ qabaatsız balaları ve qadınlarına bombalar attı, ög saflardan Donetsk tarafına toplar aylandırıldı, soñki yarım yılda ise kene Rusiye Federatsiyasınıñ Silâlı quvetleri Ukrayina şeerleyerine bombalar ata ve Ukrayina sakinlerini öldüre».
2022 senesi dekabrniñ 23-nde Rusiye Federatsiyası Ceza kodeksiniñ 280.2 maddesine istinaden (Rusiye Federatsiyası Silâlı quvetlerini itibardan tüşürüv – QA) Belozerov ev apsine alındı.
Fevralniñ soñunda Rusiye kontrolindeki Aqmescitniñ Merkeziy rayon mahkemesi Andrey Belozerovnıñ ev apsini 2023 senesi martnıñ 16-na qadar uzattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
