İşğal etilgen Qırımda sentâbrniñ 20-ne qadar Rusiye ordusını «itibardan tüşürüvnen» bağlı 979 dava açıldı. Bu aqta Ukrayina prezidentiniñ Qırım Muhtar Cumhuriyetindeki temsilciligi haber ete.
Qayd etilgenine köre, Rusiye mahkemeleri bu davalarnıñ 857 adisesinde para cezalarını berdi. 17-siniñ dava malümatı daa baqıla.
Temsilcilik malümatına köre, umumen para cezalarınıñ miqdarı eñ az 26,4 mln ruble oldı (aman-aman 11,5 mln ğrıvnâ). 377 (43%) qarar qadınlarğa qarşı çıqarıldı. 497-si (57%) – erkeklerge qarşı.
Qanunsız tutuvlarnıñ sebebi içtimaiy ağlarda Ukrayinağa qoltutuv paylaşuvları, izaatlar, Ukrayina yırları, Ukrayina devlet timsalleri, Rusiye ordusını takbih etüv ve diger şeyler ola.
Rusiye Federatsiyası büyük istilâğa başlağan soñ Rusiye ordusınıñ «diskreditatsiyası» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile. Rusiye öz qanunlarını yarımada territoriyasına kenişlete, şunıñ içün qırımlılar da bu madde boyunca mesüliyetke çekilmek telükesi altında buluna.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
