İşğal etilgen Qırımda Rusiye ordusını «itibardan tüşürüv» aqqında 1279 dava açıldı, dep bildirdi Ukrayina prezidentiniñ Qırım Muhtar Cumhuretindeki temsilciligi.
«Qırımda işğalge tirenüv artqanını işğalci «mahkemelerde» «Rusiye Federatsiyasınıñ silâlı küçlerini itibardan tüşürüv» dep adlandırılğan maddege istinaden qanunsız memuriy davalarnıñ artqanı da isbatlay», – dep aytıla haberde.
Qayd etilgenine köre, 1156 adisede para cezası şeklinde memuriy ceza berildi ya da dava başqa davağa qoşuldı ve umumiy qarar çıqarıldı. 22 adisede dava baqıla.
561 (49%-ı) qarar qadınlarğa, 593 (51%) erkeklerge qarşı çıqarıldı. Berilgen para cezalarınıñ umumiy miqdarı 35,5 mln rubleden az degil, dep bildirdi temsilcilik.
Rusiye Federatsiyası büyük istilâğa başlağan soñ Rusiye ordusını «itibardan tüşürüv» aqqında Memuriy cinayetler kodeksiniñ 20.3.3 maddesi kirsetildi. Rusiye-Ukrayına cenki aqqında malümat tarqatqanlar ve Kremlniñ noqta-i nazarına zıt kelgen er angi fikir bildirgenler taqip etile.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
