Qırımda Ukrayına gizli areketini tapmaq maqsadınen yerli ealige qarşı repressiyalar quvetleştirile, dep bildire Milliy tirenüv merkezi.
Berilgen malümatqa köre, Rusiye uquq qoruyıcıları 100-den çoq yarımada sakinini «razı olmağanlarında» şübheli sayıp tuta.
«Bundan ğayrı, duşman yarımadanıñ haberlerinde putinge qarşı tenqit ya da «mahsus arbiy operatsiyanıñ» (Rusiyede Ukrayınağa qarşı cenkni böyle adlandıralar – QA) vazifelerine zıt kelgen malümatnıñ peyda olmaması içün büyük diqqat ayıra», – dep aytıla haberde.
Merkez Rusiye quvetleri Herson vilâyetiniñ işğal altındaki qısmında habercilerniñ ağını kenişlete, dep bildirgen edi. Onıñ malümatına köre, rusiyeliler «Ukrayına tarafdarı olğan» ya da Ukrayına Mudafaa quvetlerine qoltutqan vatandaşlarnı tapmaq içün yerli sakinlerni celp ete.
Rusiye mahsus hızmetleri «çaquv» ve «şübheli areket ya da laf aqqında bildirüv» vastasınen malümat toplay. İleride ise regionda memuriy-polis şaraitlerini quvetleştirmek içün qullana, dep bildire Merkez.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
