İşğal etilgen Qırımda raketa ev üstüne tüşti, dep haber ete «Krımskiy veter» Telegram kanalı.
Qayd etilgenine köre, Rusiye quvetleri tahminen saat 12:55-te Qırımnıñ Aqmescit rayonından raketa atqanlar. O vaqıt Ukrayinanıñ cenübiy regionlarında ava telükesi ilân etildi.
«Krımskiy veter» haber etkenine köre, atılğan Rusiye raketası Aqmescit rayonınıñ Eski Lez (Skvortsovo) köyünde tüşti.
«Tereşkova soqağında ev viran etildi. Rayonnı polis ve FSB sarıp aldı. Başqa tafsilâtlar yoq», – dep aytıla haberde.
Muarririyet bu malümatnı başqa menbalarda şimdilik teşkerip olamay.
Rusiye akimiyeti malümatnı izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
