Rusiye kontrolindeki Qırım ve Aqyar musulmanları diniy idaresi müminlerni Qurban bayramı namazına maska taqıp ve öz namazlıqlarını alıp kelmege çağırdı, dep haber ete Qırım ve Aqyar musulmanları diniy idaresiniñ matbuat hızmeti.
«Pandemiya sebebinden Qırım müftiligi bütün müminlerni diqqatlı olıp, bayram namazına maska taqaraq, öz namazlıqlarını alıp kelmege ve içtimaiy mesafeni qorumağa çağıra. Namaz bitken soñ biri-birini Qurban bayramınen tebriklemek içün quçaqlaşmaqtan ve qol tutuşmaqtan vazgeçmege çağıra», – dep aytıla haberde.
Qırım ve Aqyar musulmanları diniy idaresi Qurban bayram namazı iyülniñ 20-nde saba 06:00-da olacaq, dep bildirdi.
Qırım ve Aqyar musulmanları diniy idaresi Qırımda koronavirus vaziyeti fenalaşqanından Qurban bayramı munasebetinen keçirilecek kütleviy tedbirlerni sıñırlamağa qarar berdi.
Hatırlatamız, Qırımnıñ 10 regionında yarımadada COVID-19 vaziyeti fenalaşqanı sebebinden alış-veriş merkezlerindeki aş qatlarınıñ işi yasaqlandı. Bundan ğayrı, qayd etilgen regionlarda attraktsion parkları, eglence merkezleri ve akvapark işi yasaq etildi.
Qırımnıñ Rusiye yolbaşçısı Sergey Aksenov Qırımnıñ daa altı regionında koronavirus sıñırlavlarını sertleştirdi.
Qırımnıñ Rusiye sağlıq naziri Aleksandr Ostapenko koronavirus yuqunçı ile küreş ştabınıñ toplaşuvında Qırımda COVID-19 diagnozınen hastahanege alınğan hastalarnıñ sayısı 70% arttı, dep bildirdi.
Hatırlatamız, keçken künü Qırımda bir künde qayd etilgen COVID-19 hastalarınıñ yañı rekordı oldı – 375 hasta qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Bıltır koronavirus pandemiyası sebebinden Qırımda camiler qapalı edi.
Qurban bayramı – musulmanlarnıñ eñ büyük bayramlarından biri olıp, Mekkege acılıqnıñ soñuna kelgenini temsil ete. Oraza Bayramından 70 kün keçken soñ qayd etile.
Qurban Bayramı büyük meydanlarda cemaat ile qılınğan bayram namazından başlana ve ondan soñ qurban çalına. Bu ananeniñ tamırları Allahnıñ İbraim peyğamberge oğlu İsmailni qurban ketirmege bermeyip, qoynı kesmege buyurıp toqtatqanından kele.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
