Qırımda «qoranta repressiyaları» arta, dep haber ete «Qırım birdemligi» cemaat birleşmesi.
Aq qorçalayıcılar Qırımda siyasiy mabüslerniñ cedvelini incelep, apiske alınğan ve mahküm etilgen ekiden dört kişige qadar bir-biriniñ soyu olğan 17 qoranta bar olğanını qayd etti.
«Meselâ, Aqmescitten Fatma İsmailovanıñ babası, aqayı ve qardaşı, Bağçasaraydan Lilâ Seytumerovanıñ üç oğlu ve tuvğan qardaşı, uydurılğan bir davanıñ eki mabüsi Ahtemovlar soy ola, Dilâra Abdullayevanıñ eki oğlu – Aqmescit rayonından», – dep aytıla haberde.
«Qırım birdemligi» qayd etkenine köre, Qırımnıñ ayrı rayonlarında bu tutuvlar ayrı-ayrı degil, insanlar qorantalarnen taqip etile.
Teşkilâtnıñ malümatına köre, Qırımdaki repressiyalar Dilâra Abdullayeva, Lilâ Bekirova, Ayşe Kroş, Aliye Abselâmova ve digerleriniñ qorantalarına tesir etti.
Avgust ayında Ukrayına prezidentiniñ Qırımdaki temsilciligi qanunsız tutulğan 180 yarımada sakini aqqında bildirdi. 117-si – qırımtatarıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
