Rusiye kontrolindeki Canköy rayon mahkemesi Ukrayına vatandaşını «Noman Çelebicihan qırımtatar batalyonında» iştirak etüv içün beş yıl apiste qalmasına üküm etildi, dep haber ete Rusiye kütleviy haber vastaları Rusiye FSBsiniñ matbuat hızmeti.
Berilgen malümatqa köre, erkek bu yıl aprel ayında Qırımğa kirmege tırışqanda tutuldı.
«Qırım Cumhuriyetiniñ Canköy rayon mahkemesi mabüsni cinayette qabaatlı tanıp, beş yılğa üküm etti, ilk yılını apishanede, qalğanını sert rejimli tüzetüv koloniyasında keçirecek», – dep aytıla haberde.
Mabüsniñ adı ve soyadı aydınlatılmay, açıq izaatları yoq.
Qırımtatar Resurs Merkeziniñ yolbaşçısı Eskender Bariyev «Suspilne» içün bergen intervyüsında rusiyeliler «Noman Çelebicihan qırımtatar batalyonına» alâqası bar olğanında qabaatlanğan 33-ten çoq ukrayınalını tuta, dep ayttı.
Onıñ aytqanına köre, işğalciler işğal etilgen topraqlarda yaşağan Ukrayına tarafdarlarını qorquzmağa, Rusiye mahsus hızmetleriniñ semeleri işini köstermege ve Qırımda faal çalışqanını komandanlığına bildirmege tırışa.
Qırımda «Noman Çelebicihan qırımtatar batalyonında» iştirak etüv sebebinen taqip etilgen onlarnen insan bar. Bir çoqu apis cezasını aldı ve Rusiye apishanelerinde tutula.
2022 senesi Rusiye FSBsi «Noman Çelebicihan qırımtatar göñülli batalyonını» «terror teşkilâtları» cedveline kirsetti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
