Qırımda Rusiye işğali devamında 2014 senesinden başlap aq qorçalayıcılar insanlarnıñ hırsızlanuvına dair 104 adiseni qayd etti. Bu aqta dekabrniñ 10-nda ZMINA İnsan aqları merkezi bildirdi.
Bu insanlardan 21-iniñ alı belli degil – olar ğayıp sayıla.
«Bundan ğayrı, köteklev, elektrik aqımınıñ qullanuvı, qurşunğa tizüv taqlidi ve diger psihologik terror çeşitleri olğan 55 işkence adisesi qayd etildi», – dep aytıla haberde.
Avgustnıñ 30-nda KrımSOS aq qorçalayıcı teşkilâtınıñ talilcisi Yevğen Yaroşenko bildirgenine köre, Qırım işğaliniñ doquz yılı devamında Qırımda eñ az 65 insan ğayıp oldı. Olardan 21-iniñ taqdiri ve bulunğan yeri alâ daa belli degil.
Ğayıp olğanlar arasında: İvan Bondarets, Valeriy Vaşçnük, Vasiliy Çernış, Timur Şaymardanov, Seyran Zinedinov, Eskender İbraimov, İslâm Cepparov, Cevdet İslâmov, Eskender Apselâmov, Fedor Kоstenko, Muhtar Arıslanov, Ruslan Gavniyev, Arlen Saliyev, Server Aliyev, İsmail Şemşedinov, Ablâzov E.Y., Gayday L.S., Pavlenko T.N.
Al-azırda Qırımda ğayıp olan 6 insannıñ ölü tapılğanı belli.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
