Qırımnıñ Rusiye saylav komissiyasınıñ reisi Mihail Malışev Qırımnıñ Rusiye parlamentine «Yedinaya Rossiya» (reylerniñ 74,87%), LDPR (reylerniñ 5,71%) ve Rusiye Federatsiyası Kommunistler firqası (5,15%) firqaları kirdi, dep bildirdi.
Malışevniñ malümatına köre, rey berüvde 702141 saylayıcı iştirak etti, bu 47,61% ola.
Rusiye akimiyeti sentâbrniñ 6-ndan 8-ne qadar işğal altındaki Qırım ve Aqyarda Rusiye qurğan Qanun çıqarıcı toplaşuv, Rusiye kontrolindeki Qırım parlamenti, şeer ve köy şuralarınıñ deputatları qanunsız saylavlarını keçirdi.
Bu sahte saylavlarda resmiy halqara közeticiler yoq edi. Halqara toplulıq, BM, OSCE ve diger teşkilâtlar bu saylavlarnı, netice ve deputatlarını tanımaylar.
Qırımdaki Rusiye akimiyeti bildirgenine köre, sentâbrniñ 8-nde saba yarım milliondan çoq insan Rusiye teşkil etken Qırımnıñ Rusiye parlamenti, şeer ve köy şuralarınıñ deputatları qanunsız saylavlarında iştirak etti.
Ukrayina Tış işler nazirligi Qırım ve Aqyarda Rusiye saylavlarınıñ keçirilüvini izaatlap, bu halqara uquq norma ve temellerini bozuv ola ve bu rey berüv qanunsız ola, dep bildirdi.
Avropa Birligi ilhaq etilgen Qırımda Rusiyeniñ qanunsız saylavlarını takbih etip, olarnı halqara uquq, BM Nizamnamesi ve Ukrayinanıñ suvereniteti, mustaqilligi ve topraq bütünligini bozğan daa bir areket dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
