Qırımda 2024 senesi mart ayında Rusiye Federatsiyasınıñ prezident saylavlarında Vladimir Putinni namzet köstermek içün imza toplap başladılar, dep haber ete«Mash na volne» Rusiye Telegram kanalı. Qırımtatar Milliy Meclisiniñ reisi Refat Çubarov qırımlılarnı iştirak etmemege çağırdı.
«Sizden Rusiye varvarları yapqan cinayetlerniñ iştirakçilerini yapmağa istegenlerni quvıñız», – dep yazdı Çubarov Facebook saifesinde.
Çubarov bildirgenine köre, «işğal etilgen Qırımdan kelgen malümatqa köre, Rusiye mahsus hızmetlerine işğalci akimiyetnen yaqınlaşmağa istemegen qırımtatarlarğa «imza qoydurmağa» vazife berildi».
Qırımtatar Milliy Meclisiniñ reisi qayd etkenine köre, «Rusiye işğalcileriniñ maqsadı biñlernen Ukrayına vatandaşınıñ – toprağına, halqına ve Ukrayına devletine sadıq qalğan Qırım sakinleriniñ itibardan tüşürilüvi ola». Çubarovnıñ malümatına köre, imzalar «Umumrusiye halq cebesi» içün kerek, olar insanlarğa yaşağan ve çalışqan yerlerine, cemaat yerlerine kele.
Rusiye Federatsiya Şurası dekabrniñ 7-nde oturışuvda 2024 senesi martnıñ 17-ne Rusiyede prezident saylavlarını belgiledi.
Ertesi künü, dekabrniñ 8-nde, Rusiye prezidenti Vladimir Putin 2024 senesi mart ayına planlaştırılğan saylavlarda iştirak etmege planlaştıra, dep bildirdi. 2020 senesi qabul etilgen Rusiye anayasa tüzetüvleri oña beşinci kere namzet köstermege imkân bere.
«Meduza» neşiri Kremlge yaqın menbalarına esaslanıp, noyabr ayında Rusiye prezidenti Vladimir Putin 2024 senesiniñ prezident kampaniyasında Ukrayınadaki cenkni degil, Rusiyeniñ stabilligi ve Ğarp tenqidini aytacaq, dep yazğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
