Qırımda Aluştadan dört mektep talebesi Rusiye bayrağı yoq etilgen videonı derc etkenleri içün tutuldı. Bu aqta Rusiye uquq qoruyıcılarınen işbirligi yapqan Rusiye tarafdarı qırımlı bloger Aleksandr Talipov haber ete.
Berilgen malümatqa köre, eki qız ve eki oğlan, 9-ıncı sınıf talebeleri, bir yıl evelsi, Rusiyeniñ büyük istilâsı başlağanda, bayraqnı binadan qoparıp yırttı ve üstüne bastı. Lâkin yapqanlarınıñ videosını tek şimdi paylaşqanlar. Soñra olarnı tutqanlar. Haber etilgenine köre, mektep talebeleri qayd etildi, cinaiy dava meselesi baqıla. Gençlerniñ adı ve soyadı aydınlatılmay. Rusiye uquq qoruyıcıları adise aqqında resmiy bir malümat bermey.
Rusiyede ve işğali altındaki topraqlarda Ukrayınağa qoltutqan sakinler taqip etile. Rusiye tarafdarı bloger Aleksandr Talipov Telegram kanallarında Ukrayınağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
