Qara deñizde batqan eki Rusiye tankerinden aqqan mazutnıñ lekeleri Qırımnıñ daa üç kurort şeerine – Kefe, Aluşta ve Sudaqqa barıp yetti. Bu aqta ekolog Georgiy Kavanosânnıñ malümatınaa esaslanıp, «Agentlik» neşiri haber ete.
Fotoresimlerde Kefe limanı yanında ve Takil burnunda (yarımadanıñ şarqında) deñiz yüzünde mazut zarı kösterile. Partenit köyünden başlap Sudaqqa qadar (mında Aluşta yerleşken) büyük bir yerde de kirlenüv körüne.
Derc etilgen uydu resimleri, ekolognıñ aytqanına köre, tek yer üstüniñ kirlenüvini yahşı aks eteler. Bu kurortlarnıñ etrafında ve terenlikte mazut barmı belli degil. Tankerlerden aqqan M100 çeşit mazutı qışta buzlap bata. Kavanosân qayd etkenine köre, o, yazda, araret 25 derecege çıqqanda yaldap başlaycaq. Aynı fikirni Bütünukrayina ekologik ligasınıñ başı Tatyana Timoçko da bildirgen edi.
Bugün Aqyarnıñ Rusiye yolbaşçısı Mihail Razvojayev şeerniñ plâjlarında mazutnen bulunğan 18 tonnağa yaqın topraq toplanğanını bildirdi. Aqyar – Qırımnıñ cenübiy yalısınıñ eñ ğarbiy qısmıdır.
Qırım.Aqiqat bildirgenine köre, mazut taşığan eki «Volgoneft» tankeri bazar künü, dekabrniñ 15-nde, resmiy malümatqa köre, furtuna sebebinedn Keriç boğazında battı.
Tankerler batqanı içün cermay töküldi. Rusiye kütleviy haber vastalarınıñ malümatına köre, «Volgoneft-212» 4300 tonna mazut taşıdı. Shot ve Baza «Volgoneft-239» tankerinde de aman-aman aynı kölemde mazut bar edi.
Rusiye Deñiz qurtaruv hızmeti Keriç boğazında dekabrniñ 15-nde tankerlerniñ batması neticesinde Qara deñizge 2,4 biñ tonna cermay aqıp ketti, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
