«Şimdilik rusiyelilerniñ Qırımdan kütleviy tahliyesi aqqında aytmaymız, amma areketlerinde müim bir deñişüv köremiz. Evelden yarımadada faal sürette köçmez mülk alğan olsalar, şimdi kerekmey, çünki Qırımda vaqtınca bulunalar, dep aytalar», – dep qayd etti o.
Bariyevniñ bildirgenine köre, bunıñ esas sebeplerinden biri Qırımda sıq-sıq olğan patlavlar ve Ukrayina Mudafaa quvetleriniñ muvafaqiyetli tedbirleri ola. O, rusiyeliler yarımadadaki kelecegine muqayt olıp başladı, dep qoştı, lâkin Rusiye propagandası Qırım imaye etile ve olar telükesizlikte bulunalar, dep işandırmağa tırışa.
Ukrayina mülk mütehassısları birliginiñ prezidenti Viktor Nesin Qırım.Aqiqatqa intervyü berip, Qırımda hususan elit köçmez mülkke para bermek riskli bir qarar ola, dep qayd etken edi. Ekspertniñ fikirince, Qırımdaki elita mülki bazarını yaqın vaqıtta büyük deñişmeler beklemey.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
