Ukrayına prezidentiniñ Qırım temsilciligi halqara toplulıqnı martnıñ 5-nde qırımtatarlarnıñ qanunsız kütleviy tutuvları sebebinden Rusiyege siyasiy sanktsion basqını quvetleştirmege çağırdı.
«Halqara toplulıqnı işğalcilerniñ qırımtatarlarğa qarşı yapqan cinayetlerine diqqat ayrımasına, Rusiyege qarşı siyasiy ve sanktsion basqını quvetleştirmesine çağıramız», – dep aytıla haberde.
Qayd etilgenine köre, işğal etilgen Qırımda qanunsız tintüv, apis cezazaları ve taqipler kütleviy ola.
Qırımda Rusiye kontrolindeki Aqmescitniñ Kiyev rayon mahkemesi martnıñ 5-nde qanunsız tintüvlerden soñ tutulğan 10 qırımtatar faali ve din adamını apiske aldı. Olar 2024 senesi mayısnıñ 4-ne qadar apiste qalacaqlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
