Qırımda keçken künü 16 insan koronavirustan vefat etti. Bu malümatnı oktâbrniñ 23-nde Qırımnıñ Rusiye sağlıq nazirliginiñ matbuat hızmeti derc ete.
Qırımda pandemiya başlağanından koronavirustan ölgenlerniñ sayısı 2869 insan oldı.
Nazirlikniñ malümatına köre, Qırımda koronavirus hastalarınıñ sayısı er kün arta, resmiy statistikağa köre, rekord sayılar daima yañartıla. Oktâbrniñ 22-nde saba 630 yañı hasta qayd etildi, bir kün evelsi hasta sayısı daa az edi.
Hatırlatamımız, Qırım sağlıq nazirligi bir künde qayd etilgen COVID-19 hastalarınıñ yañı rekordı aqqında bildirdi – oktâbrniñ 21-nde saba 621 yañı hasta qayd etildi.
Sergey Aksenov oktâbrniñ 30-ndan noyabrniñ 7-ne qadar raatlıq künlerini ilân etti. Oktâbrniñ 20-nde yarımadada koronavirus ile küreş tedbirleri quvetleştirildi.
Qırımda koronavirus pandemiyası sebebinden kirsetilgen yüksek seviyeli azırlıq rejimi dekabr ayına qadar uzatıldı. Oktâbrniñ 11-nde Qırımda yañı koronavirus sıñırlavları işke tüşürildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
